സോഷ്യൽ മീഡിയയിൽ സ്വർണാഭരണങ്ങളും നോട്ടുകെട്ടുകളും പ്രദർശിപ്പിച്ച് റീൽസുകൾ പങ്കുവെച്ചതിന് പിന്നാലെ തമിഴ് യൂട്യൂബറുടെ വീട്ടിൽ വൻ കവർച്ച. തമിഴ്നാട്ടിലെ നാഗർകോവിൽ തമ്മട്ടുക്കോണത്തുള്ള വിഐപി ഗാർഡനിൽ താമസിക്കുന്ന ‘മധു മൈ മാമ’ (Madhu my Mama) എന്ന യൂട്യൂബ് ചാനലിലൂടെ ശ്രദ്ധേയയായ മധുമിതയുടെയും ഭർത്താവ് വിനോദ് കുമാറിന്റെയും വീട്ടിലാണ് മോഷണം നടന്നത്. ഏകദേശം 1.43 കോടി രൂപ മൂല്യം വരുന്ന 80.3 തോല (944 ഗ്രാം / 118 പവനോളം) സ്വർണാഭരണങ്ങളും വൻ തുകയുമാണ് മോഷ്ടാക്കൾ കവർന്നത്.
തങ്ങളുടെ ദൈനംദിന ജീവിതവും ഷോപ്പിംഗും സോഷ്യൽ മീഡിയയിലൂടെ നിരന്തരം പങ്കുവെക്കുന്ന മധുമിത, അടുത്തിടെ മകൾക്ക് മേൽ 500 രൂപയുടെ നോട്ടുകൾ വാരിയെറിയുന്ന വീഡിയോയും പൂജാമുറിയിൽ ലക്ഷക്കണക്കിന് രൂപയുടെ നോട്ടുകെട്ടുകൾ വെച്ച് പ്രാർത്ഥിക്കുന്ന റീൽസും പോസ്റ്റ് ചെയ്തിരുന്നു. കൂടാതെ കുടുംബ സമേതം സ്വർണം വാങ്ങുന്ന ദൃശ്യങ്ങളും, തങ്ങൾ പുറത്തുപോകുന്ന വിവരങ്ങളും കൃത്യമായി വിഡിയോകളിലൂടെ പങ്കുവെച്ചിരുന്നു.
കുടുംബം വീട്ടിൽ ഇല്ലാത്ത സമയം നോക്കിയാണ് മോഷണം നടന്നത്. സുരക്ഷാ ജീവനക്കാരും സിസിടിവി നിരീക്ഷണവുമുള്ള ഹൈ-സെക്യൂരിറ്റി കോളനിയായിരുന്നിട്ടും, വീടിന്റെ പിൻവാതിൽ തകർത്ത് അകത്തുകടന്ന മോഷ്ടാക്കൾ വൻ കവർച്ച നടത്തുകയായിരുന്നു. യൂട്യൂബറുടെ സോഷ്യൽ മീഡിയ പോസ്റ്റുകളും യാത്രാവിവരങ്ങളും നിരന്തരം നിരീക്ഷിച്ച ശേഷമാണ് കവർച്ചക്കാർ കൃത്യം ആസൂത്രണം ചെയ്തതെന്നാണ് പോലീസിന്റെ പ്രാഥമിക നിഗമനം.
സംഭവത്തിൽ മധുമിതയുടെ പരാതിയെത്തുടർന്ന് സുചീന്ദ്രം പോലീസ് കേസെടുത്ത് അന്വേഷണം ആരംഭിച്ചു. പ്രദേശത്തെ സിസിടിവി ദൃശ്യങ്ങളും ടവർ ലൊക്കേഷൻ കേന്ദ്രീകരിച്ചുള്ള കോൾ റെക്കോർഡുകളും പോലീസ് വിശദമായി പരിശോധിച്ച് വരികയാണ്.
ആഡംബര ജീവിതവും സമ്പാദ്യങ്ങളും സോഷ്യൽ മീഡിയയിൽ അമിതമായി പ്രദർശിപ്പിക്കുന്നത് എത്രത്തോളം അപകടകരമാണെന്ന മുന്നറിയിപ്പാണ് ഈ സംഭവം നൽകുന്നത്.
